Quisisana
( di Francesco Palmieri – da “Penziere d’ammoreˮ )
Da Quisisana a Pozzano
Muntagna affatata,
tesoro ʻe sta terra:
ʻo cielo ccà ʻnzerra
na perla ʻncantata
cu ll’aria suttile,
c’ ʻo vverde ca stenne
nu manto, ca scenne
cchiù allero e gentile;
c’ addore d’ ʻe sciure
ca pittano ʻe ccase
(ca pareno vase…)
e allùmmano ʻe mmure;
cu ll’uocchie ʻe suspire
d’ ʻe femmene ardente
(ca so’ cchiù lucente,
se fanno cchiù nnire…);
cu ʻe rrisa ʻe priézza
d’ ʻe core ʻnnucente
(ca fa tutta ʻa gente
lassànno ʻa tristezza);
c’ ʻo chiaro d’ ʻa luna
pe’ ll’arbere e ʻe titte
(ca stanno cchiù zitte
p’ ʻo viento ca ʻmbruna…);
c’ ʻa nzerta d’ ʻe stelle
traponta d’ argiento
(ccà songo cchiù ʻe ciento,
cchiù chiare e cchiù belle!)
Ma a tte, Quisisana,
penziero d’ammore,
te sape ogne core:
ccà ʻo mmale se sana.
