Raffaele Viviani

Guaglione

a cura di Maurizio Cuomo

Raffaele Viviani

Viviani artista versatile, scrisse anche numerose poesie dialettali, ispirate a soggetti reali della vita di quartiere.

Grazie alla straordinaria bellezza del dialetto napoletano, il “Genio stabiese”, seppe enfatizzare con singolare abilità, alcuni aspetti tipici della vita sociale d’epoca.

Per rendere meglio l’idea di quanto detto, proponiamo una poesia scritta dal Viviani nel 1931 (Guida Editori):.

Raffaele Viviani

GUAGLIONE

Quanno pazziavo ‘o strummolo, ‘o liscio, ‘e ffiurelle,
a ciaccia, a mazza e pìvezo, ‘o juoco d”e ffurmelle,

stevo ‘int”a capa retena ‘e figlie ‘e bona mamma,
e me scurdavo ‘o ssolito, ca me murevo ‘e famma.

Comme ce sfrenàvemo: sempe chine ‘e sudore!
‘E mamme ce lavaveno minute e quarte d’ore!

Giunchee fatte cu ‘a canapa ‘ntrezzata, pe’ fa’ a pprete;
sagliute ‘ncopp’a ll’asteche, p’annaria’ cumete;

po’ a mare ce menàvemo spisso cu tutte ‘e panne;
e ‘ncuollo ce ‘asciuttàvemo, senza piglià malanne.

‘E gguardie? sempe a sfotterle, pe’ fa’ secutatune;
ma ‘e vvote ce afferravano cu schiaffe e scuzzettune

e à casa ce purtavano: Tu, pate, ll’hè ‘a ‘mparà!
E manco ‘e figlie lloro sapevano educà.

A dudece anne, a tridece, tanta piezz”e stucchiune:
ca niente maie capévamo pecché sempe guagliune!

‘A scola ce ‘a salavamo p”arteteca e p”a foia:
‘o cchiù ‘struvito, ‘o massimo, faceva ‘a firma soia.

Po’ gruosse, senza studie, senz’arte e senza parte,
fernevano pe’ perderse: femmene, vino, carte,

dichiaramente, appicceche; e sciure ‘e giuventù
scurdate ‘int’a nu carcere, senza puté ascì cchiù.

Pur’io pazziavo ‘o strummolo, ‘o liscio, ‘e ffiurelle,
a ciaccia, a mazza e pìvezo, ‘o juoco d”e ffurmelle:

ma, a dudece anne, a tridece, cu ‘a famma e cu ‘o ccapì,
dicette: Nun pò essere: sta vita ha da fernì.

Pigliaie nu sillabario: Rafele mio, fa’ tu!
E me mettette a correre cu A, E, I, O, U.