Scennènno ‘e notte

     ( di Francesco Palmieri – da   “Suonne e ricordeˮ )

Scennènno ’e  notte, p’ accurciatoia

da ’o Castiello pe’ Visanola,

dint’  ’o cerviello mio

se songhe affullate

’e cchiù ddoce ricorde;

e comme dint’ a nu specchio magico

me so’ visto guaglione.

Me so’  truvato ’ncopp’ a stu Castiello

comme  ’ntiempo passato: guagliunciello.

Me so’  venute ’e brivide int’  ’o core,

truvanneme guaglione c’ ’o penziero.

 

Scennènno ’e grariatelle, dint’ ’o scuro,

m’ aggio goduto ll’ aria prufumata,

ma nu ‟sennuzzoˮ senza puté  chiagnere

m’ ha fatto arricurdà tutt’ ’o passato!

 

E specialmente po’  quanno aggio visto

attuorno a me migliare ’e lucelùce

tra ll’ èvere e ’a muntagna, ’mmiez’ ’o vverde,

comme  stellucce, ‟simbolo di pace!ˮ

 

Aggio guardato ’o palazziello antico,

addό so’  stato ’e casa pe’  tant’ anne…

e m’ è venuta â mmente ’a voce ’e mamma,

ca me chiammava quase tutt’ ’e ssere.

 

Assieme â casa mia, aggio guardato

’e nnave, ’o mare e stu cantiere antico…

’a luna chiena tutto ha rischiarato:

feneste, balcuncielle, strade e vviche.

 

Me so’  fermato ’nnanze a la Madonna

’e Sant’Amore e ll’ aggi’ assaje pregata:

– Tu ca sì stata «’a Mamma d’ ’o dulore»

lìberame ’a tutt’ ’e ’nfamità!

  

So’  stato ’o figlio tujo pe’ tant’anne

e nun m’ abbandunà  quanno te chiammo.

Fedele è stato sempe stu rione:

te festeggiava ’nzieme a nuie, guagliune! –

 

E cchiù te guardo, cchiù me vene â mmente

guardanno a tte, Madonna mia bella,

veco ’e pregà ’a zia vicchiarella

dicenne ’e ccose ’e Ddio, tutta cuntenta.

 

Quanta ricorde ’e stu quartiere mio,

me sento dint’ a ll’anema na gioia…

me pare ’e turnà ancora nu guaglione

comm’  a na vota ’e tantu tiempo fa!

---

Le composizioni di Francesco Palmieri