Raffaele Galiero

“Ciao Maurizio, mi chiamo Raffaele, sono un estimatore di Raffaele Viviani, e Castellammare mi sta particolarmente a cuore… al che ti invio una mia poesia dedicata…”.

l’Arenile di Castellammare (foto Genny Manzo)

Castellammare

Sdraiata ‘ncopp’‘a rena, a ffaccia ‘e mare,
mmieze a ‘e reggine, pare ‘na reggina.
Napule cchiù ‘ntricante e bella pare,
sulo p’‘o fatto ca le staje vicina.

Surriento, all’ato lato te smicceia,
e se cunzola ‘e chesta vicinanza.
Te guarda, e tutto ‘o golfo s’arrecreia,
se spara ‘a posa, se dà cchiù importanza.

Tu nun te smuove, nce sì abbituata,
e nun te ne vaje ‘e cape, sì modesta.
‘A storia, ‘a ggenta, ‘a vita t’ha ‘mparata,
ca ggioje e delore songhe una menesta.

E pienze ‘e figlie ca t’hanno lassata,
a chille ca te fanno ‘o malamente,
a tutta chesta ggente disgraziata,
ca stenta ‘a vita e ca nun tene niente.

E te l’astrigne forte ‘ncopp’‘o core,
‘e ffaje curagge, truove mille scuse,
ma quanno vene ‘a sera, p’‘o dulore,
pe dint’‘o scuro, tiene ll’occhie ‘nfuse.

Ogni lacrime scesa se fa stella,
e saglie ‘ncielo pe te fa ‘a curona.
‘A ggente guarda e dice: ‘Quant’è bella.’
Se dà cchiù forza e… canta ‘na cazona.

Sdraiata a ffaccia ‘e mare, ncopp’‘a rena
mmieze a ‘e reggine, pare ‘na reggina.
Cu ‘n’a resella t’annascuna ‘e ppene,
appena siente ll’aria da matina. Continua a leggere→