Archivi tag: poesie stabiesi

Lettera a Catiello

Lascia una risposta

a cura del dott. Tullio Pesola

Le rimetto una lirica sulla nostra Città che emana dai suoi versi freschezza, spontaneità e genuinità, caratteristiche, grazie alle quali, con sobrie e ben calibrate pennellate da valente artista e con estrema accuratezza stilistica l’autore ha magistralmente immortalato la nostra meravigliosa Castellammare, facendolo con cura minuziosa fin nei minimi particolari.
Purtroppo, però, non sono riuscito a risalire al nome dell’autore. Spero che tra i tanti estimatori della Poesia in sé e della Poesia Napoletana in particolare, che simpatizzano e sostengono la Sua geniale iniziativa, qualcuno possa colmare tale mancanza.

Cordialmente, Tullio Pesola

Lettera a Catiello

Carissimo Catiello, grazie assaie

p”a lettera ca oggi m’hè mannata.

Tu, cu stu nuovo invito ca me faie,

me daie piacere e te ne sò obbligato.

M’addimmane si accetto ? Embè, te pare…

stango na settimana a’ casa toia

e me torno a gudè Castellammare,

ca, sultanto si ‘a veco, me dà goia!

so sette juorne ca nun penzo a niente,

sette juorne ‘e chest’aria mbalzamata

ca me sceta na smania sulamente:

cammenà, cammenà tutt’ ‘ a jurnata

E voglio riturnà ncoppa Scanzano,

a chella catenella che tu saie,

‘a da’ se vede Napule ‘a luntano

e nu scenario ‘e blù nun visto maie.

E voglio riturnà ncopp” o faito

saglienno ncielo cu sta univia,

ca llà, sulo guardanno chillo sito,

m”a trovo bella e scritta na poesia.

Ogne sera aggià i’ vicino ‘o mare

facenneme purtà ‘a na carrozzella,

(‘e ccarruzzelle e Napule so’ rare..)

pulita,allera,svelta,accunciulella.

E tonfa ‘rimmo d’int a ll’acqua e ‘o siente

quanno sfilano ‘e vvarche tutt’ ‘e ssere..

ca nu tunfo ‘a luntano, cchiù pussente,

risponne ‘o maglio gruosso d”o Cantiere.

E aggia  turnà a vedè chesti ssurgente,

addò cu nu bicchiere sempe chino

se n’alluntana e s’avvicina ‘a ggente,

e se beve acqua comme fosse vino.

Ma i’ voglio ll’acqua ‘e dint ‘o vicariello ,

ch’è ll’acqua d’ ‘a Madonna. E sta funtana

fragne sott’ a nu viento frizzantiello

che scenne ‘ a miez’ e sciure ‘e Quisisana,

carissimo Catiello, è na pazzia

A me spià si fa piacere a me;

dimane m’appriparo ‘a biancheria,

doppodimane già stongo addu te!

Vincenzo Izzo

Lascia una risposta

‘O Santo (Santu Catiello)

Chiorme ‘e guagliune scenneno p’‘e vie,

allere, felice, fanno ammuina a mille;

bancarelle cu ‘o turrone e mennole atterrate,

propio comme all’anne passate,

juorno ‘e festa p’‘a città!

‘O Santo è pronto for’‘a chiesa,

‘o sole arriva p’‘o Castiello

e scarfa finalmente ‘e case vecchie.

Piccerille ca chiagneno p’‘o pallone ca he vulato,

figliulelle ‘mprufumate,

p’‘e primme sguarde ‘e ‘nnammurate;

‘o Cantiere miso a festa aspetta ‘a visita d’‘o Santo.

‘Na folla abbraccia tutta ‘a chiazza,

freme cuntenta ca parte ‘a prucessione,

s’ aizeno ‘e vutive: so’ tutte figlie suoje,

s’‘o portano cu ‘e spalle, so’ vute ca se fanno.

‘O Santo mo ‘nce guarda ‘a copp’‘o bancariello,

‘a faccia ‘a tene stanca, se struje pe sta gente;

chi allucca e se fa ‘a croce, chi dice ‘na preghiera,

chi pure si è cuntento, caccia ‘o stesso ‘a lacremella.

Juorno è festa p’‘a città,

‘o Santo sta passanno,

benedici a tutte quante!

* * *

Castiellammare

Dint’a ‘n’abbraccio

tra ‘a muntagna e ‘o mare,

‘nchiantate staje tu Castiellammare,

paese mio, amato e caro.

Comme a ddoje bracce forte ‘e pate,

‘a muntagna t’astregne e t’arrepara;

comme a ddoje mane aperte ‘e mamma

‘o mare t’accarezza e te dà vase.

Vicarielle astritte saglieno d’‘o puorto,

case remote, mure stunacate,

borgo ‘e marenare, antico

comme è antico ‘o tiempo.

Luce ‘e piscature ‘mmiez’‘o mare:

stelle cadute ‘a cielo;

uocchie ‘e figliulelle appassiunate:

fuoco c’appiccia chistu core mio;

acqua ca scurre ‘a quann’è nat’‘o tiempo,

stuta stu ffuoco dint’‘o core mio

c’arde d’ammore sulo pe te:

Castiellammare,

paese mio amato e caro!

* * *

‘A Caperrina

‘Nu poco ‘e spiazzo tra quatto palazze,

‘na funtanella ca votta ‘a secule,

‘nu vascio addò se venne ‘a vita e

‘n’atu vascio addò se spera ‘e vivere.

Quas’annascunnuta, ‘na chiesiella,

piccerella e antica, segna ‘o tempo,

‘e case sgarrupate so’ senza tempo…

‘A Caperrina, quanta vita ca cunserva,

quanta storie so’ passate,

‘a Caperrina ca cchiù ‘e ‘na piazza,

è ‘na via ‘e passaggio: ‘a puteca d’‘o barbiere,

sempe ‘a stessa comm’ajere,

se lamenta sempe don Ciro, jastemma,

s’‘a piglia c’‘o governo, c’‘o Sinneco, c’‘a gente;

mastu Luigi, solachianiello, aret’‘e lente a bicchiere

vatte ‘na sola propio comm’ajere;

duje guagliune zompano ‘a ccà e ‘a llà,

pazzejano c’‘o strummolo, jocano ‘e fiurelle.

‘A Caperrina, quanta vita ca cunserva,

quanta storie so’ passate.

Donna Cuncetta arriffa ancora ‘o nummariello:

“Uè ca ‘a mano è libbera, uè ca io ‘o tiro!”

‘Nu Crucifisso guarda serio ‘a piazza,

‘na vicchiarella passa, s’arraccumanne e se fa ‘a croce,

e mastu Luigi dint’‘a puteca, sisca, canta e ‘nchiove;

cummara Celeste, acquaiola, disseta a tutte quante:

t’‘o serve d’‘a Maronna, acidula, ferrata,

t’acconcia ‘a vocca, ‘e rine e ‘a panza,

cu ‘o ghiaccio dint’ ‘a ‘nu telo e sacco,

te gratta ‘o cazzimbocchio cu ‘e mmane vecchie e stanche.

E chesta è ‘a piazza e tutta chesta è ‘a gente,

‘o barbiere, ‘o solachianiello, donna Cuncetta,

‘e nummarielle, ‘o ghiaccio e ll’acqua fresca,

‘e guagliune ca pazzejano, ‘o Crucifisso, ‘a vicchiarella:

Chesta è ‘a Caperrina addò so’ nato,

addò jucavo ‘o strummolo, ‘e fiurelle;

addò guaglione: scarpe rotte e faccia tosta,

me so’ ‘mparato ‘a vita.

‘A Caperrina, quanta vita ca cunserva,

quanta storie so’ passate,

addò è passata pure ‘a vita mia!

* * *

‘A gente ‘e stu quartiere (Caperrina)

‘A gente ‘e stu quartiere nun’arreposa

sbarea comme ha da fà’ pe campà’,

è ‘nu tiatro a cielo apierto

e ll’attore songo ‘a gente stessa.

‘Nce truove ‘o favezo pezzente,

ca sotto ‘o matarasso tene ‘e llire a ciente,

nun po’ mancà’ ‘a capera, ‘a femmena cuntesa,

‘o malamente, ma ‘nce sta pure ‘a bbona gente.

Nun tene tregua sta recitazione,

‘o juorno è comm’a notte, ‘a notte è comm’‘o juorno,

ancora nun lampea, e ‘a voce ‘e ll’acquaiuolo,

ca pare ‘nu lamiento, sceta a tutte ‘e luce:

‘o tengo d’‘a Maronna, acidula, ferrata…

chi veve, bella gente, neh chi veve!

‘O masto d’‘e chiantelle fatica già ‘a mez’ora,

mentre ‘a mugliera, faveza, s’antenne cu ‘o cusutore.

Ninuccia ‘a pisciaiola è prena ‘n’ata vota,

s’appicceca cu ‘e figlie ca già ne songo nove.

Chiorme ‘e guagliune, all’angolo d’‘o vico,

senz’arte e senza scola, sperano sulo ca vita ‘nce va bona,

‘o juorno è comm’‘a notte, ‘a notte è comm’‘o juorno.

Chi arriffa ‘e nummarielle, chi invece fa ‘e cartune,

chi accatta e po’ rivenne, chi nun po manc’accattà’.

‘E piscature tornano cu ‘a fatica d’‘a nuttata,

‘e vvote ‘a sciorta è bbona, ma spisso è malamente!

Destino amaro tene chesta gente,

fortuna avversa e tanta malapatenza.

‘E femmene, ‘mpiette se chiudeno‘a disperazione,

‘o curaggio ‘e vivere, miserie e preghiere;

cercano a Ddio ogne mumento e so’ sicure d’‘o truvà’.

‘A speranza, chella nun po mancà’,

‘o sole esce pe tutte quante!

Ogge o dimane, ‘a sciorta cagnarrà:

furtuna bbona trase dint’‘e case

e ‘nu surriso ‘e piccerille

t’accogliarrà a braccia aperte.

Angelo Giordano

Lascia una risposta

“Caro Caro Dott. Cuomo, le invio questa mia composizione, dedicata alla mia amata Castellammare il giorno 8 settembre del 1999 a Pieris (Gorizia). Sperando che le sia gradita. Arrivederci e Grazie”.

CASTELLAMMARE

Notte smaniosa e bella

accucculiata a mille stelle!

cù na Luna, briosa e macchiavella.

Puorte curaggie, a chi fà brutte jurnate,

ammore e gioia, e coppie de nnammurate,

nu vientariello frisco e doce, pur’isso t’è alliato.

 Notte schiarata, d’a luce de lampare,

pure lu Vesuvio, d’into c’è cumpare

se mòvono lente l’onne, d’a brezza e chistu mare.

 Nun c’è so’ cose brutte,

attuorno a sta calma notte,

pure lu piscitiello, saglie e sfotte.

Se vede miezo ‘o core d’o Faito, lu Castiello!

rannicchiato a guardia d’a città e San Catiello.

Stu quadro è ormai cumpleto, è nu paese bello!

Pe’ ricordo, pure ‘a Madunnella,

c’è lasciaje, na funtanella.

Raffaele Calogero

Lascia una risposta

Le due poesie a seguire sono liberamente tratta da “Liete ricorrenze e Sognando Faito”, una raccolta di poesie dialettali del maestro Calogero.

‘Addo’ Zemberenielle ‘o pizzaiuole!

Cu ‘a pizzaria dò viche ‘e San Vicienze,
Zemberenielle è ‘o meglie pizzaiuole,
era nu maste, ‘e cu santa pacienze,
faceve ‘e pizze belle cumm’o sole!

Pigliava chella pasta è arruvutave,
cu chelli ‘mmane fatte pò mestiere,
pe ‘ncopp’o sciore ‘e pacchere sunave
sule a vedè sti pizze jh! Che piacere!

Zemberenielle tutte ‘nguacchiate ‘e sciore,
cu ‘o cappellone jò cammese ‘mbiancate,
metteve ‘ncopp’e pizze chin’ammore,
pepe, vasenicola prufumate!

‘O fumme jà ‘ddore ‘e chesti margarite,
cu muzzarelle, pummarole ‘e ccase,
‘stu pizzaiuole vuie nun ‘o crerite,
per chesti pizze, ‘o resse ciente vase!

Ih! Che sapore mocca ca te siente,
vire che sape fà Zemberenielle,
mo correne ‘a du Isse tutt’a’ggente,
per chesti pizze: levammece ‘o cappielle!

* * *

‘O Canine jo Mulare!

‘Ncoppe Faite, da ‘o Monte e San Michele,
duie Vescheve, ‘Nduline e San Catielle,
sott’a na Grotta, cu a luce ‘e na cannele,
preiane ‘a Dio, guardanne ‘o ciele jè stelle!

Rèt’a ‘sta Grotta, che corne ‘sta appizzate,
‘và Satana spianne ‘a ‘sti duie Sante,
tentanne ‘e farle fa cocche peccate,
jenne rubanne ‘a fede ‘a tutte quante!

Nu lampe e po’ nu truone scenn’a ciele,
cu ‘a spada sfudarata spicche ‘o vole,
so schiatte sott’e piere, è San Michele,
le rompe ‘ll’uocchie, ‘o nase, e pur’e’mmole!

Stà bestia chin’e fuoche, fumm’e fele,
sbuffanne ‘a vocca ‘e riente e bile amare,
jettaie ‘ncopp’a ‘o Monte ‘e San Michele,
duie pizze ‘e nu canine e nu mulare!

Si mò tu guarde ‘a cresta ‘e stì muntagne,
vìre ‘e duie pizze ancora ‘e chistì riente:
‘A storia è semp’a stessa ‘e nun se cagne,
stu fatte ‘o va cantanne tutt’a gente!

* * *

Le due poesie a seguire sono liberamente tratte da “Fantasie Stabiese: Ricordi”, una raccolta di poesie del maestro Calogero pubblicata nel 1989.

Catielle Catelle!

‘Stu nomme ‘nce stà ancora chi arricorde,
nu tipe snelle, alte ‘e currentone,
faceva ogne mestiere è pe ffà sorde,
sempe elegante ‘e mmano nu bastone!

‘O vere tipe pe fa fesse ‘a ggente,
si presentava ‘a sinneche e avvucate,
quanne faceve cheste era cuntente,
campanne sempe ‘a copp’ e spalle ‘e ll’ate!

Se presentaie na vota ‘int’o paese,
cumm’e nu gran signore possidente,
isse magnave è chi pavave e spese,
ca vocca soia ‘mbrugliava tutt’a ggente!

Tutta ‘sta ggente ch’era fatta fesse,
se mettene accuvate ‘a nu purtone,
passanne ‘a llà, chi ‘o currette ‘appriesse,
‘e chi ‘o pigliaie ‘a schiaffe e chi a bastone!

‘E lucche pò arrivaiene ‘inte stelle,
e fernette e fa Catielle ‘e pò Catelle!

* * *

‘E biscotte ‘e Riccarde!

Ih! Che profume ‘e zucchere ‘e cannelle,
Riccarde ne sfurnava biscuttine,
freselle e tarallucce accussì belle,
che t’addubbave ‘o stommache ‘a matine!

Teneva nu segrete, era n’addose,
senza se fa vedé che ‘ncio metteve,
è ‘nce ‘mpastave pure ll’ati ccose,
robba ca sultant’Isse cunusceve!

Bagnante, pacchianelle ‘e furastiere,
currevane ‘o Rillorge addù Riccarde,
rigneve chilli cuoppe cu maniere,
biscotte, tarallucce e savuiarde!

Pò Munne hanne rirate sti biscotte,
Riccarde è nu ricorde ‘e giuventù,
mo fanne sulamente pane cuotte,
chella bellezza, nun ‘a verimme cchiù!

Certo di fare cosa gradita, rimetto alla vostra attenzione alcune poesie dialettali liberamente tratte da “Pennellate Stabiesi”, una raccolta d’autore, pubblicata a Castellammare nel settembre del 1985.

‘O pianine ambulante!

‘Nu viecchie, ‘e nomme Zì Giuvanne ‘e DDio,
cù nà puteca ‘ncoppe ‘a Capurrine,
cù ‘nù pianine viecchio ieva p”e vie,
purtanne ‘e serenate ogne matina!

All’angule d”e viche addò fermava,
sentevene canzone belle d’ammore,
‘a chistù suone ‘a ggente s’affacciava,
‘stà serenata ‘e rallegrave ‘o core!

Se stanca ‘a mano ‘o viecchie à girà ‘à rota,
se’ cagna ‘a mano pé cagnà canzona,
‘lle dice ‘nà guagliona: n’ata vota,
me suone ‘stù mutivo ‘e passione!

P”e vie nun sé sente cchiù ‘o pianino,
‘o viecchio è stanco ‘e se sò rott”e ccorde,
‘stù suone nun ‘ncé scete cchiù ‘a matina,
‘e Zì Giuvanne ‘e DDio resta ‘o ricordo!

* * *

‘A carruzzella!

Rieste sempe ‘a regina ‘dd’e vvie!
Quanne steve ‘a cascetta cù tico,
t’annuccave, ‘e cù ‘cchiù fantasia,
‘a girà pé ‘sti vasce ‘e ‘sti viche!

‘Nnanz’a ‘a tè stù cavalle ca trotta,
p”e vvie larghe nun ‘ce ‘stà chi te ‘ntoppa,
‘sta carrozza nun piglie ‘nà botta,
‘è ‘o scurriate ‘o cucchiere cà schioppe!

Quanta spose, ‘a spusà tu è purtate,
quanta corse ‘o ‘spitale ch’hè fatte,
‘mò ‘o signore d”o treno è arrivato,
pè girà ‘nzieme ‘a tte vene ‘a patte!

Nun hè fatte ‘a nisciune mai male,
sott’è ‘rrote nun hè fatte maie muorte,
nun te ponne chiammà criminale,
vai cchiù lente, e peccheste c’haie tuorte!

Mò ca sola staie chiusa ‘int’à stalla,
pienze ancora ‘e ricorde ‘e ‘sti vvie,
‘nzieme a tè pur’è stanco ‘o cavallo,
pé cumpagna te ‘stà ‘a pucundria!

Corre l’auto, ma si ‘e vvie songo astrette,
site tante, e pecchesse fermate,
chi ‘ncarrozza hè à girà ‘mbiciclette,
cù ‘sti mezze cchiù ambresse arrivate!

* * *

‘O Paese mio!

Ognune se vanta ‘o paese native,
si pure nun è belle ‘o stesse s”o vanta!
Però giudicate si mò v”o descrive,
si è overe ch’è bello dicite altrettante!

Tene pe’ sfondo ‘o vverde ‘e sti monte,
ogne stagione se cagne ‘e culore,
cu ‘o russo cu ‘o gialle se tegnene ‘e pponte,
pere ‘nciò mette ‘na mana ‘e pittore!

Pe’ liette ‘stì monte ‘nce tene nù mare,
se specchia ‘n’azzurre e nù ciele c’affaccia,
‘nù mante ‘e rignante ‘stù mare me pare,
pazzeiano ‘e vvele cù ‘ò viente ‘e bunaccia!

Tè forma nà curva ‘stù golfo ‘e rimpette,
cù Napule, Capre, Surriente cà vide,
‘stì case cà ‘a mare ‘e culure riflette,
tu rieste ‘ncantato cchiù guarde, cchiù ammire!

Sò mille culure ‘e ‘stì ccase in culline,
sò tante ‘stì ville cu ‘o vverde ‘a luntano,
strette abbracciate ‘stì ccase vicine,
pare stà ‘a mare ‘a culline ‘e Puzzane!

Nà cascia d’armonica chè maraviglia!
Che musica siente int’à villa ogni sera,
‘a Norma, ‘a Traviata, ‘o Barbiere ‘e Siviglia
te leva ‘a tristezza te siente cchiù allera!

Ricorde l’artiste ccà ‘nterre so nate,
‘e musiche ‘e Denza p’ò munne ‘a girà;
rumanze e canzone e cchiù appassiunate
te cante ‘o Vesuvie ” Funiculà “!

Sò figlie ‘e ‘stà terra Viviani e Bonito,
artiste cà ‘a nuie nun ponne turnà,
Bonito pittore ‘o cchiù favurito,
Viviani p”o munne ha sapute cantà!

A fora à ‘stì prete sò tanta funtane,
sò ciente sapure cà ‘st’acqua ‘nce tene,
si sule t”o vvive rinfresca e te sana,
‘e pè tanti ccose chest’acqua ffà bene!

‘E pè stù Cantiere me chiagne ‘stù core,
‘a gloria d”e nnave cu ‘o sanghe è descritta,
‘stà flotta cù ggloria, curaggio ed onore,
‘a Patria ‘e vittorie, maie avute scunfitte!

‘E ‘ncoppa ‘a ‘stù mare ‘stà fermo ‘o Castiello,
cà Carlo D’Angiò ‘o teneve cchiù caro,
guardanne ‘o Paese d”o munne cchiù bello,
dicette cu ‘o core: CASTIELLAMMARE!

* * *

‘O Varo!

Se vede na festa pè tutt”o paese,
pè fore ‘e balcune sò spase ‘e bandiere,
annuccata ‘stà Nave col grande pavese,
tu pruove nà gioia pè tutto ‘ò Cantiere!

Pare ‘a Sirena sdraiata ‘a ‘nù lietto,
cumm’à ‘nà sposa ‘stà Nave me pare,
‘e tutt’è ‘mmitate l’ammira ‘e l’aspetta,
‘stà Nave cuntenta pè scennere ‘a mmare!

Già pronta ‘a Madrina c’aspetta ‘ò cummanne,
‘e taglià ‘o nastre e si è libera ‘a via,
‘a voce d”o Sposo: Se rompe ‘à sciampagne,
và ‘a mmare ‘stà Nave in nome di Dio!

Bella se move, cchiù scenne cchiù scorre,
e già tocca ll’acqua che scumma fà ‘a prora,
se regne ‘stù mare è già ferma ‘a zavorra,
‘e tutt’è Sirene ,nce fanne ‘nù core!

‘Stì Maste ‘e Cantiere si ‘è gguarde int’a ‘ll’uocchie
‘nà lagrima brilla, ‘nce tene nascosta,
‘o sanghe ‘è stà ggente à ‘stà Nave s’accocchia
purtanne ‘sti core addò à Nave s’accosta!

* * *

Funtanelle ‘e Quisisana!

Funtanelle ‘e Quisisana,
sempe fresche ‘e zampillante,
vuie aurnate ‘stu viale,
mmiez’a st’albere ‘e castagna,
iè tenite annascunnute
‘e ricorde ‘e core amante,
ca se fanno ‘a scappatella
mmiez”o vverde d”e muntagne!

Quando torna ‘a Primmavera,
vuie sentite cchiù l’ammore
che s’affaccia int”a chest’acqua,
se renfrescano ‘e vucchelle,
mmiez”o vverde curallino,
s’addurmentano sti core!
(E’ ll’ammore d”e guaglione,
è ll’ammore ‘e piccerelle)!

M’arricorde quanne io pure,
chistu core era guaglione,
te cercava, te vuleva,
te purtava ‘a sti funtane,
‘e ‘a chell’ombra te parlava
te cercava comm’o ‘ppane,
passianno ‘a core ‘a core,
strette strette pe sti ‘mmane!

‘E stu sussurrie d’ammore,
pure vuie pare ascultate,
dint”a ‘st’acqua ‘sti ricorde
mentre scorreno ‘e funtane!
So’ prumesse, giuramente
de ‘sti core ‘nnammurate,
comm’a ‘st’acqua ca se perde:
(Funtanelle ‘e Quisisana!)

* * *

‘A Cascia Armonica!

‘Nce chiagne ‘o core quanne passianne,
piglianne ‘o ppoche ‘e sole mmiez”a villa,
cumm’a ‘nà cascia ‘e muorte te guardamme,
(Ncé vulisse rinfaccià cù ciente strille!)

Vulisse dì ‘à stà ggente cà passea,
è ‘stannete vicine senza scuorne,
(vuie site senza core ‘e cchiù ‘e ‘ll’ebbreie,
ve site già scurdate ‘e chilli juorne!)

Ogne stagione ‘o popole affullave,
venennese ‘a piglià li poste annanze,
‘a centenare ‘e mmane me schiuppave,
pé ‘ll’opere e p”e celebre rumanze!

Sunava ‘Aida, ‘a Tosca, ‘a Traviata,
‘o Rigoletto, ‘a Norma, ‘o Truvatore,
‘e pate vuoste io l’aggio saziate,
‘e chesti ‘nnote aggio rignute ‘o core!

Mò cu ‘stà giuventù ch’è chiene ‘e fuoco,
c’à rumba, ‘o roccherrolle ‘e ‘o ciacciacciaie,
fà sule mosse è balle toche toche,
tè stona ‘e rrecchie ‘e nun ‘a fernesce maie!

Perciò nun me guardate cù disprezzo,
senza parlà cchiù ‘e mè c’avite tuorte!
‘Pe causa ‘e ‘stì balle ‘e stì schifezze,
songhe pè vvuie cumm’à ‘na cascia ‘e muorte!

* * *

‘Ll’opere ‘e puzzulille!
(ovvero il teatro di San Carlino)

‘Nà vota steve dint’à Scala ‘e Tatore,
‘o triatielle ‘e ‘ll’opera d”e pupe,
‘nù castagnaro all’angolo che addora
venneve ‘allesse dint”o cuoppe cupe!

Fore ‘o triate cù ciente cartielle,
leggevene ‘e sturielle ‘e chella sera,
guerre ‘e Rinalde ‘e fatte ‘e Zi Bacchielle,
sò cose ‘e storie, songhe fatte overe!

Appena ‘int’ò triato aiza ‘o telone,
lottene ‘e pupe ‘a spade ‘e cù curtielle
pure ‘e guagliune cù ‘e scorze ‘mellone,
‘à sunà ‘nfaccia ‘e se tirane ‘e ‘ppelle!

Pure ‘stù munne pare ‘nù triate,
‘mmiez’à ‘stà ‘ggente pupe ‘s’addevente,
cu ‘o cape ‘e spave tù si cummannate,
‘è pè campà faie ‘o fesse cà ‘nun siente!

Scuola Primaria “Basilio Cecchi” (anno 2007/08):

Lascia una risposta

La mia città
( Gli alunni della classe IV sezione D )

Vado in giro per la mia città
e vedo bellezze di qua e di là:
le tante sorgenti di acque minerali
con le loro proprietà eccezionali,

dove si va allegramente a tuffare
un bel biscotto di Castellammare,
mentre vien, dalla Cassa Armonica,
il suono di un’orchestra sinfonica.

Alzo lo sguardo e vedo la funivia
che verso il Faito veloce vola via,
in Cattedrale, dall’alto del suo trono,
benedice San Catello nostro Patrono.

L’austero Castello, tutto illuminato,
guarda questa meraviglia del creato;
sei unica e bella o mia Castellammare,
seduta tra i tuoi monti ed il tuo mare!

* * *

Castellammare
( Gli alunni della classe IV sezione E )

Mi affaccio dal Castello sul mare
ed ammiro la mia Castellammare:

vedo le barche dei pescatori,
colme di pesci dai mille colori;

vedo le sue numerose sorgenti,
che volentieri bevono tutte le genti;

volare gabbiani nel cielo azzurro
e nel cuore sento un dolce sussurro;

la Cassa Armonica nella Villa Comunale,
mentre allegra suona una banda musicale;

la Cattedrale con Palazzo Farnese,
orgoglio e vanto del nostro paese;

è proprio bella questa mia città
ed è la pura e sacrosanta verità!

* * *

Le bellezze di Castellammare
( Gli alunni della classe V sezione G )

A Castellammare tante acque puoi trovare
che da diverse malattie ti possono sanare,
tanti capolavori puoi ammirare,
tante cose squisite puoi gustare:

la Cassa Armonica in Villa Comunale,
il Castello, gli Scavi e la Cattedrale ;
i famosi biscotti, il “casatiello”
e la pizza di “Zemberiniello”.

Se vuoi fare una cosa davvero bella,
fa’ un giro nella celebre carrozzella,
che piano piano ammirare ti farà:
tutte le bellezze di questa città